تخاريف واحد مصرى يمكن تكون صح

فى البداية اعذرونى ان المقال بعيد شوية بس مش اوى عن التكنولوجيا لكن عندى شوية حاجات عاوز اقولها ممكن تسمحلى ؟ طيب شكرا كلك ذوق عموما هكمل بردة اكيد فية ناس تانية موافقة . بص يا سيدى انا هعتبرك كدة راجل محترم ورئيس جمهورية وهسالك كام سؤال ... وانا بردة الى هجاوب عليهم بما اننا داخلين عصر الديمقراطية فكل واحد يلحقلوا شوية من الدكتاتورية قبل متنقرض المهم .

لو انا اديتك معلومة بسيطة وقلتلك ان فية شعب 75 % منة مصدر معلوماتة وثقافتة هى التليفزيون . هوة دة الحاجة الى بتحركة . هتعمل اية لو بقيت ريس للشعب دة ؟

الجواب : يااااااااااااااة دى حاجة جامدة جدا تخلى الواحد ديكتاتور علطول

سؤال : يااااة ديكتاتور مرة واحدة طب ازاى تقعد اطول فترة ممكنة تحكم الشعب دة كديكتاتور ؟

جواب : ياعم دى بسيطة خالص هجيب وزير اعلام محترم كدة وكويس وابن ناس عشان نقدر نثقف الشعب دة كويس ونعلمة من خلال مصدر ثقافتة الوحيدة . وميمنعش بردة انى اشوف وزير تعليم محترم كدة وابن ناس عشان الناس متفكرش تشوف مصدر معلومات تانية غير التليفزيون . ومفيش مانع ياسيدى نبقى نغير الوجوة كل شوية عشان الناس متملش بس الافكار واحدة طبعا وبالنسبة لل 30 % الباقيين نشوفلهم بردة وزير داخلية كويس ومحترم وابن ناس ومفيش مانع نبقى نبنى شوية معتقلات كدة وبس يا سيدى .

سؤال : ياااااااة دة انت ابن لذينة على كدة نظامك دة ممكن يقعد اد اية ؟

جواب : ياعم يديك طولة العمر البركة فى العيال

وبعد مروووووووووووووووووووووووووووووووووور 30 سنة تغيرت ثقافة الشعب تجاة التليفزيون من 70% الى 40% وطلعلنا حاجة كدة اسمها فيس بوك استحوزت على ثقافة 30% من الشعب . طبعا لازم نرجع نعمل حوار تانى مع واحد تانى صاحب الراجل الاولانى بردة مش غريب ياعنى ولا حاجة

سؤال : لو انت عندك شعب  مصدر ثقافتة 40 % تليفزيون و 30% فيس بوك تحكمة ازاى ؟

جواب : ياعم دى بسيطة خالص التليفزيون وانت عرفت خلاص ازاى بنتعامل معاة اما الفيس بوك دة بقى لازم شوية تخطيط اصل الى علية فاكرين نفسهم مثقفين يبقى احنا لازم نعملهم تشتيت فى مصدر معلوماتهم مابين اشاعات وحقايق وميمنعش بردة نعملهم كام بروفايل وكام صفحة بتاع حاجات انت فاهم طبعا ياعنى .

سؤال : طب واية لزمتة الحاجات دى

جواب : بص يا سيدى لما الاسلاميون يمسكوا البلد نخليهم يقفلوا المواقع ال وبعد طبعا لما البتاع الى اسمة الفيس بوك دة يتملى صفحات نبقى نقفلة لدواعى دينية .

سؤال : طب تتعامل ازاى مع الوضع الحالى عشان تقدر تمسك البلد دى باعدين ؟

جواب : لا انا مش هتعامل انا هسيبهم هما يتعاملوا مع بعض وميمنعش ابقى اتدخل من بعيد لبعيد كدة

سؤال من الراجل التانى : طب انت عمال تقولى 75 % امال مين ال 25% التانيين دول ؟

جواب : لا حضرتك دول مش هياثروا معاك فى حاجة لانهم دول الطبقة الكادحة الى مش متعلمين اصلا ولا لاقيين ياكلوا عشان يعرفوا يجيبوا تليفزيون وحتى لو جابوا واحد بايظ معندهمش وقت يتفرجوا علية لانهم بيروحوا بيوتهم هيموتوا من تعب الدنيا اخرهم ويناموا

اعذرونى لو صدعتكم بس اتمنى ان الغاية تكون وصلت فى النهاية . لا تسمع وتردد من مصدر معلوماتك . فقط ابحث وتاكد فان لم تجد فلا تردد

وتصبحوا على خير