ما هو الذكاء الاصطناعى Artificial Intelligence ؟

بواسطة أحمد علاء 2/3/2015 4:13:00 AM


الذكاء الصناعى هو ببساطة اننا بنخلي الكمبيوتر يفكر لوحده او ياخد قرار لوحده و الاكتر من كده انه يتعلم لوحده وده مش حلم او خيال علمى ده واقع موجود بالفعل و بيتطور كل يوم و اكتر مثال الالعاب اللى بتلعبوها كل يوم.

يعني مثلا نمسك لعبة PES او FIFA اللاعب اللى بيلعب فى الفريق اللى قدامك متوقع انه متبرمج باللى بنسميه ال traditional Programming ؟ ان احنا بنديله كل امر المفروض يعمله ؟ بمعنى لو راح يمين روحله يمين لو راح شمال روحله شمال لو جري اجري لو وقف اتزحلق و هكذا ..... ؟

الشركات لو هتعمل اللعبة كده هتقعد شغالة فيها اقل واجب بال 6 و ال 7 سنين والفكرة ان برنامج اللاعب بيدخل على training simulation الاول و بحددله goal انه مثلا يشوط الفاول و يجيبها فى الجون وهو يتصرف انا مش بحددله الخطوات اللى هيمشي عليها هو يتصرف بطرق و الجوريزمات معينة خاصة بمجال ال Machine Learning المهم يحقق الهدف اللى انا طلبته منه باعلى دقة ممكنة بعد ما برنامج اللاعب يوصل لاعلى دقة بيدخلوه بقى فى البرنامج الاساسي بتاع اللعبة و هكذا بقى قس على ذلك كل برامج الذكاء الصناعى.

فيه هنا بقى سؤالين مهمين :
امتى ممكن نقيس مدى الذكاء لاى برنامج ؟ فيه حاجة اسمها Turing Test ابتكره واحد من اهم علماء ال Computer Science و هو Alan Turing ده عبارة عن ايه ؟ انت عملت برنامج انت بتقول ان البرنامج ده خبير فى نقطة معينة او مجال معين بيجيبوا البرنامج ده و على الناحية التانية واحد بشري خبير فى نفس المجال و الاتنين محجوبين ورا ستار و بييجي واحد خبير فى ال Turing Test و يبتدى من خلال برنامج chat يسال ده سؤال و ده سؤال لو الخبير قدر يحدد ان اللى بيكلمه ده برنامج مش خبير بشري حقيقي يبقى البرنامج ده فشل فى الاختبار.

السؤال التانى بقى و الاهم هل معنى كده ان الكمبيوتر ذكي فعلا ؟ عشان نوصف المشكلة دى نبتدى نتعرف على ال Chinese Room Experiment الفيلسوف الامريكي John Searle طرح التجربة الفكرية دى عشان يتعرض لموضوع هل الكمبيوتر ليه وعى و عقل و لا لا.

التجربة دى عبارة عن ايه؟
انت اكيد ما بتعرفش صيني صح؟ ما اعتقدش ان عندى حد فى ال friends بيعرف صيني تخيل بقى انا جبتك و حبستك فى اوضة و قفلت عليك من برة الاوضة دى كل اللى فيها عبارة عن كتاب كتاب فيه شوية تعليمات لو مشيت عليها و نفذتها بالحرف هتقدر تترجم اى رسالة من الصيني للانجليزي و ساعتها هتقدر تفهمها و لما تحب ترد عليها هتقدر من خلال نفس كتيب التعليمات انك تترجم الرد بتاعك من انجليزي لصيني دلوقتى جه واحد صيني واقف برة الاوضة و عاوز يسالك سؤال هيكتب سؤاله على ورقة و يمررهالك من تحت عقب الباب هتاخد الورقة طبعا انت مش فاهم اى حاجة هتستخدم الكتيب عشان تترجمها و تفهمها و ترد عليها و هكذا و الرد هتبعتهوله من تحت الباب برضه.

الفكرة بقى الراجل الصيني ما يعرفش اى حاجة من اللى بتحصل فى الاوضة هيبقى ايه انطباعه عنك ؟ اكيد هيفهم ان الراجل اللى فى الاوضة صيني زيه من جودة الرد و خلوه من الاخطاء اللغوية صح؟ بس هل ده معناه انك بتفهم صيني ؟

هى نفس الفكرة انت كشخص بتستخدم برامج الذكاء الصناعى ما تعرفش اى حاجة عن اللى بتحصل جوة هيتهيألك ان الكمبيوتر ذكي جدا انه بيعرف يعمل الحاجات دى كلها لوحده من غير ما يتبرمج عليها بس الحقيقة انك لو عرفت التفاصيل اللى بتحصل جوة هتعرف ان الكمبيوتر ما بيفهمش اى حاجة من دى هو بي simulate ال human mind انما مش بيشتغل زيه فيه دلوقتى اتجاه انهم يعملوا simulation لل feelings بتاعة الانسان عشان الكمبيوتر يحس بس ده اللى هيبان للى ما يعرفش حاجة انما اللى فى المجال و فاهم ايه اللى بيحصل هيفهم ان ده مجرد simulation.

وتعليقا على ما قاله Stephen Hawking عن إن الذكاء الإصطناعي ممكن بعد كده يكون خطر علينا بصراحة مش مع Hawking في خوفه لا هو و لا Elon Musk هو الفكرة انهم خايفين ان الذكاء الاصطناعي يتجاوز الذكاء البشري هو انا معاهم ان ده ممكن يحصل في يوم من الايام بس مش معاهم في خوفهم هما خايفين لكذا سبب.

اول حاجة خايفين ان ده يتسبب في القضاء علي البشرية زي ما بنشوف في الافلام وانا مش معاهم في الخوف ده لان ده يتطلب ان الكمبيوتر يكون ليه Consciousness او وعي و ده مش موجود غير عندنا.

تاني حاجة انه ممكن يتسبب في القضاء علي وظائف و عمالة الكمبيوتر هيحل محلها انا برضه ضد ده لو هتلاحظ ده الخوف الازلي من الميكنة اول ما الماكينات اتعملت الناس خافت تخسر وظايفها و مع ذلك طلعت وظايف جديدة مكانها و سبنا المكن يعمل القديمة بدقة اعلي مننا و لما الكمبيوتر طلع ظهر نفس الخوف تاني و مع ذلك الحياة ماشية زي الفل.

انا معاهم ان الذكاء الصناعي هيحل محل البشر في بعض الوظائف بس الحياة هتستمر زي ما هي و هيظهرلنا وظايف جديدة مكانها ... من الاخر انا مش معاهم في الخوف.


تابع الكاتب عبر : تويتر , فيسبوك